L-aħħar riżultati tal-OECD għandhom ikunu twissija serja għas-sistema edukattiva ta’ Malta

Ir-rankings edukattivi globali tal-PISA 2025 juru li l-istudenti Maltin sejrin lura fil-qari, fil-matematika u fix-xjenza

L-aħħar riżultati tal-OECD ippubblikati fir-rankings globali tal-edukazzjoni PISA juru li l-prestazzjoni ta’ Malta marret lura fil-matematika, fil-qari u fix-xjenza meta mqabbla mal-2022.

Fil-matematika, 56% biss tal-istudenti Maltin ta’ 15-il sena laħqu tal-inqas il-livell minimu ta’ kompetenza, meta mqabbel ma’ 67% fl-2022 u ma’ 65% bħala medja fil-pajjiżi tal-OECD.

Fil-qari, iċ-ċifra niżlet minn 64% fl-2022 għal 52% biss fl-2025, meta mqabbla ma’ medja ta’ 69% fil-pajjiżi tal-OECD.

Fix-xjenza, 63% biss tal-istudenti Maltin ta’ 15-il sena laħqu tal-inqas il-livell minimu ta’ kompetenza fl-2025, meta mqabbel ma’ 70% fl-2022 u ma’ 74% bħala medja fil-pajjiżi tal-OECD.

Dan huwa tnaqqis sinifikanti: 11-il punt perċentwali fil-matematika, 12-il punt fil-qari u 7 punti fix-xjenza.

Il-PISA huwa eżami internazzjonali ta’ referenza mmexxi mill-Organizzazzjoni għall-Kooperazzjoni u l-Iżvilupp Ekonomiku (OECD), li jevalwa l-prestazzjoni tal-istudenti madwar id-dinja. Ikejjel kemm studenti ta’ 15-il sena kapaċi jużaw ħiliet bażiċi fil-qari, fil-matematika u fix-xjenza. Ma jkejjilx dak kollu li huwa importanti fl-edukazzjoni, iżda tnaqqis fit-tliet oqsma ewlenin ma jistax sempliċement jiġi injorat. Dawn mhumiex biss ċifri. Warajhom hemm żgħażagħ, l-opportunitajiet tagħhom u l-futur tagħhom.

Bħala pajjiż, irridu nirriflettu bis-serjetà fuq l-istat ta’ dan is-settur vitali u nfasslu triq ’il quddiem li taqdi l-ġid komuni. Dan ma għandux jinbidel f’eżerċizzju ta’ propaganda politika jew f’tentattiv biex jintefa’ t-tort fuq l-edukaturi tagħna.

Dak li Malta teħtieġ huwa qabża vera fil-kwalità tal-edukazzjoni.

Irridu ninvestu fl-għalliema u fl-edukaturi tagħna u nagħtuhom l-appoġġ li jeħtieġu, insaħħu l-litteriżmu u n-numeriżmu, nindirizzaw l-iżvantaġġ edukattiv u noħolqu l-kundizzjonijiet biex kull tifel u tifla jkunu jistgħu jiksbu riżultati aħjar.

Il-Partit Nazzjonalista huwa lest li jagħti sehmu permezz ta’ konsultazzjoni serja dwar il-policies u l-istrateġiji li jsawru s-sistema edukattiva ta’ Malta.

L-ambizzjoni tagħna għandha tkun ċara: nieqfu niddefendu s-sistema kif inhi u nibdew intejbuha.

Uliedna jistħoqqilhom aħjar. L-edukaturi tagħna jistħoqqilhom aħjar. Malta jistħoqqilha aħjar.

Jerome Caruana Cilia
Shadow Minister għall-Edukazzjoni u ċ-Ċittadinanza

12.09.2026