Robert Abela ma fadallux fuq min idur u ma’ min jaħdem
Nesa li skont hu l-arloġġ dejjem miexi ’l quddiem u qatt ma jmur lura
Bl-għażla ta’ Johann Buttigieg mill-ġdid bħala Kap Eżekuttiv tal-Awtorità tal-Ippjanar – aħbar li żvelat il-gazzetta il-Mument tal-Ħadd li għadda u kkonfermatha t-Times of Malta llum, Robert Abela qed jikkonferma kif ma baqagħlu lil ħadd ma’ min jaħdem u fuq min idur.
Il-musical chairs ta’ Robert Abela illum saru neċessità għax ma fadallux fuq min idur. Tant li se jkollu jreġġa’ l-arloġġ lura u jerġa’ jpoġġi lil Johann Buttigieg CEO tal-istess awtorità, sitt snin wara li telaq mill-istess kariga.
Abela donnu nesa li skont hu, l-arloġġ dejjem miexi ’l quddiem u qatt ma jmur lura.
Il-Partit Nazzjonalista jerġa’ jenfasizza li dawn it-tip ta’ karigi fl-awtoritajiet għandhom jgħaddu mill-iskrutinju tal-Kumitat Permanenti dwar il-Ħatriet Pubbliċi tal-Parlament.
Gvern immexxi mill-Partit Nazzjonalista jkun impenjat serjament fi prattiki ta’ governanza tajba u kontabilità.
Il-Partit Nazzjonalista jesiġi li l-Awtorità tal-Ippjanar tkun istituzzjoni indipendenti u ħielsa minn kull indħil politiku, u li tippromwovi żvilupp sostenibbli li jirrispetta l-interessi tan-nazzjon kollu, fejn l-interessi tal-poplu u l-ambjent ikunu l-prijorità.
Dan jista’ jsir biss permezz ta’ riforma kompleta u olistika tas-sistema tal-ippjanar u mhux billi jiitreġġa’ l-arloġġ lura u jiġu rriċiklati ħatriet kontroversjali, inkluż ta’ nies li gew ippruvati li kienu qrib persuni li huma implikati f’uhud mill-iktar delitti u skandli serji li twettqu fl-aħħar snin.
Stanley Zammit
Shadow Minister għall-Ippjanar u l-Artijiet
07.01.2025